Bhaktivedanta Library


Biblioteca Inicio Śrīla Prabhupāda ISKCON Idiomas English Español Pусский Português English - Español English - Pусский English - Português Español - Pусский Español - Português Pусский - Português Autores Libros Básicos Referenciales Ensayos Narrativos de los Ācaryas Filosóficos de los Ācaryas De Śrīla Prabhupāda Los Grandes Clásicos Sobre Śrīla Prabhupāda Narrativos de discípulos de Prabhupāda Filosóficos de discípulos de Prabhupāda De la segunda generación Publicaciones periódicas Toda la biblioteca Sitios Templo Virtual de ISKCON Istagosthi Virtual Calendario Vaiṣṇava Kṛṣṇa West

Śrīmad-Bhāgavatam
Canto 7 - La Ciencia de Dios
<< 2 - Hiraṇyakaśipu, rey de los demonios >>

Indice

Transliteración

Devanagari

Descripción


7.2.1		śrī-nārada uvāca bhrātary evaṁ vinihate hariṇā kroḍa-mūrtinā hiraṇyakaśipū rājan paryatapyad ruṣā śucā
7.2.2		āha cedaṁ ruṣā pūrṇaḥ sandaṣṭa-daśana-cchadaḥ kopojjvaladbhyāṁ cakṣurbhyāṁ nirīkṣan dhūmram ambaram
7.2.3		karāla-daṁṣṭrogra-dṛṣṭyā duṣprekṣya-bhrukuṭī-mukhaḥ śūlam udyamya sadasi dānavān idam abravīt
7.2.4-5		bho bho dānava-daiteyā dvimūrdhaṁs tryakṣa śambara śatabāho hayagrīva namuce pāka ilvala vipracitte mama vacaḥ puloman śakunādayaḥ śṛṇutānantaraṁ sarve kriyatām āśu mā ciram
7.2.6		sapatnair ghātitaḥ kṣudrair bhrātā me dayitaḥ suhṛt pārṣṇi-grāheṇa hariṇā samenāpy upadhāvanaiḥ
7.2.7-8		tasya tyakta-svabhāvasya ghṛṇer māyā-vanaukasaḥ bhajantaṁ bhajamānasya bālasyevāsthirātmanaḥ mac-chūla-bhinna-grīvasya bhūriṇā rudhireṇa vai asṛk-priyaṁ tarpayiṣye bhrātaraṁ me gata-vyathaḥ
7.2.9		tasmin kūṭe ’hite naṣṭe kṛtta-mūle vanas-patau viṭapā iva śuṣyanti viṣṇu-prāṇā divaukasaḥ
7.2.10		tāvad yāta bhuvaṁ yūyaṁ brahma-kṣatra-samedhitām sūdayadhvaṁ tapo-yajña- svādhyāya-vrata-dāninaḥ
7.2.11		viṣṇur dvija-kriyā-mūlo yajño dharmamayaḥ pumān devarṣi-pitṛ-bhūtānāṁ dharmasya ca parāyaṇam
7.2.12		yatra yatra dvijā gāvo vedā varṇāśrama-kriyāḥ taṁ taṁ janapadaṁ yāta sandīpayata vṛścata
7.2.13		iti te bhartṛ-nirdeśam ādāya śirasādṛtāḥ tathā prajānāṁ kadanaṁ vidadhuḥ kadana-priyāḥ
7.2.14		pura-grāma-vrajodyāna- kṣetrārāmāśramākarān kheṭa-kharvaṭa-ghoṣāṁś ca dadahuḥ pattanāni ca
7.2.15		kecit khanitrair bibhiduḥ setu-prākāra-gopurān ājīvyāṁś cicchidur vṛkṣān kecit paraśu-pāṇayaḥ prādahañ śaraṇāny eke prajānāṁ jvalitolmukaiḥ
7.2.16		evaṁ viprakṛte loke daityendrānucarair muhuḥ divaṁ devāḥ parityajya bhuvi cerur alakṣitāḥ
7.2.17		hiraṇyakaśipur bhrātuḥ samparetasya duḥkhitaḥ kṛtvā kaṭodakādīni bhrātṛ-putrān asāntvayat
7.2.18-19		śakuniṁ śambaraṁ dhṛṣṭiṁ bhūtasantāpanaṁ vṛkam kālanābhaṁ mahānābhaṁ hariśmaśrum athotkacam tan-mātaraṁ ruṣābhānuṁ ditiṁ ca jananīṁ girā ślakṣṇayā deśa-kāla-jña idam āha janeśvara
7.2.20		śrī-hiraṇyakaśipur uvāca ambāmba he vadhūḥ putrā vīraṁ mārhatha śocitum ripor abhimukhe ślāghyaḥ śūrāṇāṁ vadha īpsitaḥ
7.2.21		bhūtānām iha saṁvāsaḥ prapāyām iva suvrate daivenaikatra nītānām unnītānāṁ sva-karmabhiḥ
7.2.22		nitya ātmāvyayaḥ śuddhaḥ sarvagaḥ sarva-vit paraḥ dhatte ’sāv ātmano liṅgaṁ māyayā visṛjan guṇān
7.2.23		yathāmbhasā pracalatā taravo ’pi calā iva cakṣuṣā bhrāmyamāṇena dṛśyate calatīva bhūḥ
7.2.24		evaṁ guṇair bhrāmyamāṇe manasy avikalaḥ pumān yāti tat-sāmyatāṁ bhadre hy aliṅgo liṅgavān iva
7.2.25-26		eṣa ātma-viparyāso hy aliṅge liṅga-bhāvanā eṣa priyāpriyair yogo viyogaḥ karma-saṁsṛtiḥ sambhavaś ca vināśaś ca śokaś ca vividhaḥ smṛtaḥ avivekaś ca cintā ca vivekāsmṛtir eva ca
7.2.27		atrāpy udāharantīmam itihāsaṁ purātanam yamasya preta-bandhūnāṁ saṁvādaṁ taṁ nibodhata
7.2.28		uśīnareṣv abhūd rājā suyajña iti viśrutaḥ sapatnair nihato yuddhe jñātayas tam upāsata
7.2.29-31		viśīrṇa-ratna-kavacaṁ vibhraṣṭābharaṇa-srajam śara-nirbhinna-hṛdayaṁ śayānam asṛg-āvilam prakīrṇa-keśaṁ dhvastākṣaṁ rabhasā daṣṭa-dacchadam rajaḥ-kuṇṭha-mukhāmbhojaṁ chinnāyudha-bhujaṁ mṛdhe uśīnarendraṁ vidhinā tathā kṛtaṁ patiṁ mahiṣyaḥ prasamīkṣya duḥkhitāḥ hatāḥ sma nātheti karair uro bhṛśaṁ ghnantyo muhus tat-padayor upāpatan
7.2.32		rudatya uccair dayitāṅghri-paṅkajaṁ siñcantya asraiḥ kuca-kuṅkumāruṇaiḥ visrasta-keśābharaṇāḥ śucaṁ nṛṇāṁ sṛjantya ākrandanayā vilepire
7.2.33		aho vidhātrākaruṇena naḥ prabho bhavān praṇīto dṛg-agocarāṁ daśām uśīnarāṇām asi vṛttidaḥ purā kṛto ’dhunā yena śucāṁ vivardhanaḥ
7.2.34		tvayā kṛtajñena vayaṁ mahī-pate kathaṁ vinā syāma suhṛttamena te tatrānuyānaṁ tava vīra pādayoḥ śuśrūṣatīnāṁ diśa yatra yāsyasi
7.2.35		evaṁ vilapatīnāṁ vai parigṛhya mṛtaṁ patim anicchatīnāṁ nirhāram arko ’staṁ sannyavartata
7.2.36		tatra ha preta-bandhūnām āśrutya paridevitam āha tān bālako bhūtvā yamaḥ svayam upāgataḥ
7.2.37		śrī-yama uvāca aho amīṣāṁ vayasādhikānāṁ vipaśyatāṁ loka-vidhiṁ vimohaḥ yatrāgatas tatra gataṁ manuṣyaṁ svayaṁ sadharmā api śocanty apārtham
7.2.38		aho vayaṁ dhanyatamā yad atra tyaktāḥ pitṛbhyāṁ na vicintayāmaḥ abhakṣyamāṇā abalā vṛkādibhiḥ sa rakṣitā rakṣati yo hi garbhe
7.2.39		ya icchayeśaḥ sṛjatīdam avyayo ya eva rakṣaty avalumpate ca yaḥ tasyābalāḥ krīḍanam āhur īśituś carācaraṁ nigraha-saṅgrahe prabhuḥ
7.2.40		pathi cyutaṁ tiṣṭhati diṣṭa-rakṣitaṁ gṛhe sthitaṁ tad-vihataṁ vinaśyati jīvaty anātho ’pi tad-īkṣito vane gṛhe ’bhigupto ’sya hato na jīvati
7.2.41		bhūtāni tais tair nija-yoni-karmabhir bhavanti kāle na bhavanti sarvaśaḥ na tatra hātmā prakṛtāv api sthitas tasyā guṇair anyatamo hi badhyate
7.2.42		idaṁ śarīraṁ puruṣasya mohajaṁ yathā pṛthag bhautikam īyate gṛham yathaudakaiḥ pārthiva-taijasair janaḥ kālena jāto vikṛto vinaśyati
7.2.43		yathānalo dāruṣu bhinna īyate yathānilo deha-gataḥ pṛthak sthitaḥ yathā nabhaḥ sarva-gataṁ na sajjate tathā pumān sarva-guṇāśrayaḥ paraḥ
7.2.44		suyajño nanv ayaṁ śete mūḍhā yam anuśocatha yaḥ śrotā yo ’nuvakteha sa na dṛśyeta karhicit
7.2.45		na śrotā nānuvaktāyaṁ mukhyo ’py atra mahān asuḥ yas tv ihendriyavān ātmā sa cānyaḥ prāṇa-dehayoḥ
7.2.46		bhūtendriya-mano-liṅgān dehān uccāvacān vibhuḥ bhajaty utsṛjati hy anyas tac cāpi svena tejasā
7.2.47		yāval liṅgānvito hy ātmā tāvat karma-nibandhanam tato viparyayaḥ kleśo māyā-yogo ’nuvartate
7.2.48		vitathābhiniveśo ’yaṁ yad guṇeṣv artha-dṛg-vacaḥ yathā manorathaḥ svapnaḥ sarvam aindriyakaṁ mṛṣā
7.2.49		atha nityam anityaṁ vā neha śocanti tad-vidaḥ nānyathā śakyate kartuṁ sva-bhāvaḥ śocatām iti
7.2.50		lubdhako vipine kaścit pakṣiṇāṁ nirmito ’ntakaḥ vitatya jālaṁ vidadhe tatra tatra pralobhayan
7.2.51		kuliṅga-mithunaṁ tatra vicarat samadṛśyata tayoḥ kuliṅgī sahasā lubdhakena pralobhitā
7.2.52		sāsajjata sicas tantryāṁ mahiṣyaḥ kāla-yantritā kuliṅgas tāṁ tathāpannāṁ nirīkṣya bhṛśa-duḥkhitaḥ snehād akalpaḥ kṛpaṇaḥ kṛpaṇāṁ paryadevayat
7.2.53		aho akaruṇo devaḥ striyākaruṇayā vibhuḥ kṛpaṇaṁ mām anuśocantyā dīnayā kiṁ kariṣyati
7.2.54		kāmaṁ nayatu māṁ devaḥ kim ardhenātmano hi me dīnena jīvatā duḥkham anena vidhurāyuṣā
7.2.55		kathaṁ tv ajāta-pakṣāṁs tān mātṛ-hīnān bibharmy aham manda-bhāgyāḥ pratīkṣante nīḍe me mātaraṁ prajāḥ
7.2.56		evaṁ kuliṅgaṁ vilapantam ārāt priyā-viyogāturam aśru-kaṇṭham sa eva taṁ śākunikaḥ śareṇa vivyādha kāla-prahito vilīnaḥ
7.2.57		evaṁ yūyam apaśyantya ātmāpāyam abuddhayaḥ nainaṁ prāpsyatha śocantyaḥ patiṁ varṣa-śatair api
7.2.58		śrī-hiraṇyakaśipur uvāca bāla evaṁ pravadati sarve vismita-cetasaḥ jñātayo menire sarvam anityam ayathotthitam
7.2.59		yama etad upākhyāya tatraivāntaradhīyata jñātayo hi suyajñasya cakrur yat sāmparāyikam
7.2.60		ataḥ śocata mā yūyaṁ paraṁ cātmānam eva vā ka ātmā kaḥ paro vātra svīyaḥ pārakya eva vā sva-parābhiniveśena vinājñānena dehinām
7.2.61		śrī-nārada uvāca iti daitya-pater vākyaṁ ditir ākarṇya sasnuṣā putra-śokaṁ kṣaṇāt tyaktvā tattve cittam adhārayat

Dona al Bhaktivedanta Library